呢次活動真係好特別，參加嘅長者年齡由80歲到101歲，精神同活力都令人佩服。朝早我哋一齊去咗文化館參觀，欣賞唔同時代嘅藝術同文化，之後再到我哋餐廳享用午餐。餐廳外面環境好靚，啟岸一帶充滿特色，大家都把握機會喺出邊影相打卡，笑聲同快門聲此起彼落。
最精彩嘅部分就係之後嘅造紙工作坊。見到長者們咁專注投入喺每一步造紙過程，由撈漿、壓水到裝飾，每個人都充滿好奇同熱情。當佢哋親手完成一張張獨一無二嘅環保手造紙時，面上流露出滿足同自豪嘅神情，令我深受感動。亦刷新參加我哋工作坊嘅年齡紀錄。
呢個體驗唔單止令佢哋獲得成功感，對我嚟講都係一種觸動。見到佢哋咁投入，令我更加堅信要繼續推廣環保造紙術。呢項活動除咗傳遞環保理念，亦有助唔同年齡層人士舒緩情緒，重拾自信同價值。希望未來可以舉辦更多類似活動，讓更多人透過親手創作，體驗到生命中嘅溫度與力量。